Neue Musik

Nöiji Muusig (ängl. new music, frz. nouvelle musique) isch dr Sammelbegriff für die underschiidlige Ströömige vo dr komponierte, middelöiropäisch brägte Muusig vo öbbe 1910 bis zur Geegewart. Iire Schwerpunkt lit in Komposizione vo dr Muusig vom 20.Joorhundert. Si isch bsundrigs dur Erwiterige vo der klanglige, harmonische, melodische und rhüthmische Middel und Forme charakterisiert, wo zum Däil radikal si. Si suecht die ganz Zit nöiji Kläng und Forme oder brobiert alti Stiil uf e nöiji Art z verbinde, was zum Däil eso bassiert, ass mä alti Dradizione witerfüert, aber zum Däil au bewusst bricht und das cha as Fortschritt erschiine oder as Ernöijerig (Neo- oder Post-Stil).

Die Nöiji Muusig cha grob iidäilt wärde in d Zit vo öbbe 1910 bis zum Zwäite Wältchrieg – vilmol as Modärne bezäichnet – und dr Nöiorientierig noch em Zwäite Wältchrieg, wo hüfig as "radikal" empfunde und mäistens as Awanggarde apostrofiert wird, bis zur Geegewart. Die zwäit Periode wird mänggisch iidäilt in d "50er-, 60er-, 70er-Joor", die letschte drei Dezennie vom 20. Joorhundert wärde mäistens nid witer differenziert (dr Begriff Postmodärne het sich nit duuregsetzt).

Wemm mä über d „Muusig vo dr Geegewart“ im ängere Sinn schwätzt, wird dr Begriff Zitgenössischi Muusig (ängl. contemporary music, frz. musique contemporaine) brucht, ooni dass mä eso e festi Periodisierig macht. Dr Begriff Nöiji Muusig isch vom Muusigschurnalist Paul Bekker im ene Vordraag 1919, wo dä Naame ghaa het, brägt worde.